Peyğəmbər (s.a.a.s.)buyurmuşdur ki, oruc insana aşağıdakı 7 xislət əta edir.
1. "Haramı bədəndən təmizləyir".Halal bədənə qarışmış haramı orucdan başqa, heç bir vəchilə bədəndən çıxarmaq mümkün deyildir. Bədəndə nə qədər haram ət-qan varsa, o qədər də insanı harama sürükləyəcək. O haramı bədəndən çıxarmağın yeganə vasitəsi orucdur.
2. "İnsanı Allah rəhmətinə yaxınlaşdırır".Məlum olduğu kimi rəhmətdən uzaq yalnız haram bədəndir. Madam ki, bir insanın bədəninin haram hissəsi oruc tutmaqla azalır, deməli o şəxs Allahın rəhmətinə yaxınlaşır.
3. "Etdiyi xətaların kəffarəsidir." Oruc tutan şəxs elə bil ki, etdiyi xətaların cəriməsini ödəyir .Necə ki, Adəm (s.a.a.s.)behiştdə nəhy olunmuş meyvədən yediyi üçün, onun xətasının kəffarəsi (yəni cəriməsi) olaraq ona bir ay oruc tutmaq əmr olundu. Çünki, yeməyin insan bədənində əlamətləri bir aya kimi qalır.
4. "İnsan öləndə ona hörmət olunur".Ölən vəqti insan üçün qiyamət anının ilkin başlanğıcı, ən çətin məqamıardan biridir. Əlbəttə həmin ölüm anında ancaq halal bədənlə dünyadan köç eləyən şəxsə hörmət olunacaqdır.
5. "Qiyamət günündə aclıq və susuzluqdan əmniyyətdə olur".Bu imtiyaz qiyamət günündə insana ona görə verilir ki, o,bu dünyada Allahın əmrinə tabeçilik edərək ac və susuz qalmışdır. Onun dünyada ac və susuz qalması qiyamət gününün aclıq və susuzluğunun zəmanətidir.
6. "Cəhənnəm odundan bəraət alır."Cəhənnəm odu məhz haram bədən üçün yaradılmışdır. Cəhənnəm odu əslində halal bədəni yandırmaq qabiliyyətində deyildir. Əgər bədən tamamilə halal olarsa, cəhənnəm odu onu yandıra bilməyəcəkdir. Bu haramı da məhz oruc vasitəsilə bədəndən çıxarmaq mümkündür.
7. "Cənnət əbədi nemət olaraq ona əta olunur".Əlbəttə, hər hansı bir şəxs bədənindəki haramı təmizləyərsə, etdiyi günahların kəffarəsini ödəməklə Allah rəhmətinə yaxınlaşaraq cəhənnəm odundan bəraət alarsa, həmin şəxs mütləq behiştə daxil olub əbədi olaraq onun misilsiz nemətlərindən faydalanmalıdır.
Bu qeyd etdiklərimdən başqa, orucun insan üçün aşağıdakı faydaları da vardır.
a)Oruc insanı adət və şəhvət hökumətçiliyindən azad edir. İnsan üçün ən xətərli və qorxulu hökumətçilik pis adət və nəfsə bəndəçilik hökumətçiliyidir. Adicə siqaret çəkməyə adət etmiş şəxsi orucluq nəfsə bəndəçilikdən bir ay müddətində azad edir. Bununla da həmin bu oruc insanda iradə və inam yaratmaqla onu mətin bir insana çevirir.
b)Orucluq insani şəfəqqətləri və mehri dirildir. Dövlətlilər il ərzində həmişə zəngin süfrələrdə otururlar. Aclıq nə olduğunu bilmirlər. Oruc tutduqda aclığın nə olduğunu anlayaraq imkansız və fəqirlərə qarşı onlarda rəhmkarlıq və şəfəqqət hissi oyanır. Nəticədə onların ruhu ən ali insani bəxşişlərə cilvələnərək fəqir və imkansızlara öz kömək əllərini uzadırlar.
c)Orucun sağlamlıq cəhətindən də çox böyük cismani xeyirləri vardır. İnsan yaşadıqca onun bədənində xəstəlik törədən mikroblar əmələ gəlir. Hər şeyin bir təzadı olduğu kimi həmin xəstəlik törədən mikrobları yeyib qidalanan digər mikroblar da bədəndə xəlq olunmuşdur. Lakin həmin mikroblar insan bədənində fəaliyyətdən düşür. Ac qalanda isə fəallaşır və xəstəlik törədən mikrobları yeyirlər.
Deməli, oruc tutan adamın bədənində olan xəstəlik törədən mikrobları yeyən digər mikroblar oruc tutmaq vasitəsilə fəallaşıb xəstəlik mikroblarını yeyib məhv edirlər. Bununla da insanda sağlamlıq üçün şərait yaranır.
Elə bu səbəbdən də bir çox institutlarda və elmi-tədqiqat mərkəzlərində aclıq ilə müalicə üsulu elmi şəkildə təsdiq olunmuş və aclıq ilə müalicə etmə geniş surətdə həyata keçirilməkdədir.
Rəbbimiz bu mübarək Ramazan ayının bütün fəzilətlərindən, nemətlərindən və gözəlliklərindən hər birimizə nəsib etsin inşallah.
